KUALA LUMPUR: Model Ekonomi Baru (MEB) ti deka dipejalaika enda lama da enda ngemaduka hak bumiputera tang deka ngemeranka pengawa kerejasama enggau raban ukai bumiputera, ku penerang ari Dewan Rakyat kemari.Menteri ba Opis Menteri Besai Datuk Seri Mohamed Nazri Abdul Aziz madah entara atur kerejasama nya ila iya nya ari segi politik enggau promosi ba pengawa dagang.
“Kitai deka awakka bisi kerejasama entara orang bumiputera enggau ukai bumiputera,” ku iya lebuh nyaut tanya ari Datuk Mahfuz Omar (Pas-Pokok Sena) ba Dewan Rakyat kemari.
Mahfuz deka nemu pekara bekaul enggau bumiputera ba MEB deka deka dipejalaika enda lama da agi lalu atur ke deka dipejalaika kena nyeliahka penanggul ti deka nuntung entara raban bansa ke bisi di menua tu.
Nazri madah status enggau hak bumiputera enda dikemaduka ba MEB lalu kena nentuka pekara nya, tiap pengawa ke dipejalaika mesti nitihka atur sereta undang-undang menua tu.
“Kitai semina ka madah bumiputera enggau ukai bumiputera ulih beserakup kena ngemujurka menua tu,” ku iya.
Lalu, nyaut tanya ari Datuk Billy Abit Joo (BN-Hulu Rajang) bekaul enggau pengawa nyama rata ke undang-undang ba kriteria pengelala bumiputera enggau kriteria ke dikena ba Sarawak, ku Nazri, pekara nya enda ibuh dipejalaika.
Tu laban status Bumiputera udah sama rata lalu serimbai enggau tiga kategori ke bisi diundan ba Perlembagaan Persekutuan.
Tiga kategori nya iya nya Orang Melayu, “anak negeri” Sabah dan Sarawak sereta Orang Asli, ku iya.
Nazri madah Perlembagaan Persekutuan ke dikena ba serata menua tu tampak nyebut kategori ke patut diberi ngagai Bumiputera lalu pekara nya udah diputuska. — Bernama
0 comments:
Post a Comment