SRI AMAN: Raban bansa Dayak enda ulih enda ngubah chara sida berunding dalam semua pekara ti besengkut paut enggau pengidup enti sida deka terus ensepi penyamai mansang, ku Kaban Parlimen Sri Aman, Masir Kujat.
Ku penemu iya, dalam dunya ti balat udah moden tu, raban bansa Dayak enda ulih enda lengkas nyingkang ngambika enda tinggal singkang ari raban bansa bukai, lalu ngambika sida sama berimbai segembar ngemansangka menua.
“Ubah dalam chara sida berunding ari chara lama ngagai chara baru besai bendar guna ngagai raban bansa Dayak enti sida deka sama nyingkang sereta sama tikas pemaju enggau raban bansa bukai,” ku iya.
“Chabar dalam dunya enggau era moden begunaka semua kitai mungkal ngereja pengawa dalam mayuh bengkah panga pengawa lalu enda bepanggai ba siti pengawa tauka siti jalai ngidupka diri aja,” ku iya.
Pekara tu dipansutka iya lebuh ke bejaku ba pengerami bejadi Projek Jalai Kampung, Rumah Lamat, Kampung Lepong Empeliau, Sri Aman lemai kemari.
Ku iya, raban bansa Dayak patut bechuan sereta beteladanka raban bansa Cina enggau Melayu ke maju dalam mayuh pampang pengawa enggai kereja, kelebih agi dalam pengawa dagang.
Ba pengerami ti sama, Masir mega ngerah madah agih 2009 penyampau RM10,000 diberi ungkup kena ngagai jalai kampung sereta penyampau ti sama diberi ngagai Komiti Pemansang enggau Pengelikun Pendiau (JKKK) Rumah Lamat, JKKK Rumah Janggoi Ambu, San Ucap (RM10,000); JKKK Rumah Meramat, San Tabut (RM2,000); Projek Jalai Kampung JKKK Rumah Gangga, San Tabut (RM20,000); JKKK San Kemantan (RM10,000); JKKK Lepong Simpai (RM10,000); Projek Jalai Kampung Rumah Kilau, San Ugol (RM10,000); JKKK San Ugol Baruh (RM10,000) enggau lima Biro Indu ari rumah panjai dalam kandang menua Lepong Empeliau ke sama diagihka RM3,000 siku-siku.
0 comments:
Post a Comment