KUALA LUMPUR: Nilai moral baka enda ditagang lebuh bejalaika pengarap, toleransi, pengelikun enggau adil ke dipegai teguh rayat Malaysia ngelamatu deka terus nyadika tulang belakang ngagai menua tu, taja pan bisi nyadi ulah vandalisme nyerang gerija enggau palan sembiang ke bukai ba menua tu empai lama, ku Menteri Besai menua Malaysia, Datuk Seri Najib Tun Razak.Iya madah menua tu ke ngembuan mayuh macham pupu bansa enggau pengarap nyadika pengering sereta meri penegap ngagai menua tulalu nya nyadika tulang belakang perintah deka bejalaika atur 1Malaysia, iya nya atur ti ngembuan tuju deka ngadaka menua ti tegap sereta adil.
“Tu nyadi ka chabar paling besai, tang enti kitai begempung bejalaika atur nya, nya ulih ngujungka menua kami deka bulih pemujur ke besai,” ku iya lebuh nulis ba sukut penemu dalam majalah The Wall Street Journal ke bisi dikeluarka kemari.
Najib madah ulah vandalisme ke nyerang palan-palan sembiang enggau ulahbetunuka gerija Metro Tabernacle Church empai lama lalu ditangkanka enggau reaksi ari rayat Malaysia.
“Kami deka ngemai orang ke ngereja pengawa vandalisme nya ngagai Kut. Tu meh maya iya kami patut bediri teguh lalu enda kakang ati laban ke sigi enda ulih nerima pengawa ke baka nya lalu deka bulih pemujur nengah atur 1Malaysia,” ku iya.
Ba sukut nya, Najib mega madah nya endang lain ari ripot ke ditulis media menua luar. Berindik ari nya, rayat Malaysia begempung ngelaban sereta mantah ulah vandalisme ke nyerang gerija sereta palan-palan sembiang ke bukai di menua tu.
Ku iya, rayat pupu bansa di menua tu saum penemu ngutuk ulah vandalisme nya lalu madahka ulah nya sigi enda diterima rayat menua tu.
“Raban orang Islam udah sukarela deka nyaga gerija ke bisi ba kandang menua sida. Aktivis sosial Islam mega bisi nulis ngutuk ulah orang ke nyerang gerija nya. Kumpulan sivik Islam mega beserakup enggau orang Kristian, Hindu enggau Buddha kena nentuka semua orang lantang ati sereta likun lebuh bejalaika pengawa dalam pengarap sida,” ku iya nambah baru.
Najib madah pemesai orang Kristian enggau Islam mega minta semua rayat sabar sereta ngatur sesi randau antara pengarap laban sida nemu orang ke ngereja pengawa nya ukai orang ke ngarika majoriti orang Islam ba Malaysia.
Iya madah semua rayat Malaysia deka begempung mutarka isu nya.
Ku Perdana Menteri, mayuh rayat Malaysia pedia ati enggau tuduh ke selebubu ngapa ke dipansutka raban politik menua tu ketebal agi semina mentingka politik sida empu enti dibandingka enggau mentingka menua tu laban suah mansutka jaku pasal isu sensitif ti bekaul enggau insiden nya.
“Tang, perintah milih atur ke lain ari enggi sida,” ku iya.
Iya madah, perintah menua Malaysia seruran semak enggau rayat sereta bejalaika sesi randau tebuka sereta naka ulih mutarka penanggul isu sensitif nya.
Najib madah menua tu mesti seruran bejalaika atur ti adil sereta meri peluang ngagai mensia mayuh kelebih agi di menua tu.
“Ubah ke udah digaga kelebih agi ba sektor utama ekonomi, meransang orang menua luar bedagang di menua tu, numbuhka klinik-klinik 1Malaysia kena meri servis pengerai ngagai rayat sereta ngerembaika peluang belajar ngagai semua rayat menua tu,” ku iya.
Tang, ku iya, politik mega ngenanggul ubah ti deka dipejalaika.
“Tang ubah tu penting laban tikas pengerai enggau ekonomi rayat Malaysia ba timpuh ke panjai semina ulih digaga bepelasarka penyerakup rayat.
“Kami enda nginsit ari niat kami deka nyapai numbuhka menua 1Malaysia,” Ku Najib lebuh nulis ba sukut majalah nya. — Bernama
0 comments:
Post a Comment