Ungkus tu kena bejalaika projek di menua pesisir nyengkaum projek jalai alun, bekal karan baruh atur NKRA
SIBU: Sarawak deka nerima RM1.7 biliun kena ngaga sereta ngemanahka agi jalai alun lalu RM1.7 biliun da agi kena bejalaika projek bekal karan ba baruh Bidang Keberhasilan Utama Negara (NKRA) kena ngemanahka agi infrastruktur ba sitak menua pesisir.Menteri Pemansang Menua Pesisir enggau Pelilih Menua Datuk Seri Mohd Shafie Apdal madah menua tu mega deka bulih RM9 juta kena bejalaika projek bekal ai beresi.
Bejaku ngagai bala pengarang berita sepengudah tembu bejalaika pengawa taklimat pemansang ba sitak Lanang ke dikenataika Kaban Parlimen sitak nya iya nya datuk tiong Thai King ditu malam kemari, ku iya menua tu mega deka bulih bajet RM100 juta kena bejalaika projek berumah.
Mohd Shafie madah ungkus nya 10 kali lebih mar ari ungkus di Semenanjung ketegal gaya menua Sarawak ke mayuh bukit.
“Ambika chunto, ba atur begagaka jalai alun, kontraktor mesti mutarka penanggul tanah lemi ba mayuh endur. Sida mesti masang besi kena negapka agi jalai alun. Sida mega mesti nganjung perengka misin enggau barang kena begagaka jalai nya ngagai endur ke jauh ketegal gaya menua ke bebukit lalu nya ngujungka ungkus bejalaika projek nya niki,” ku iya.
Ku iya, Kira-kira 40 juta meter kabel deka dikena lebuh bejalaika projek bekal karan ba sitak menua pesisir di Sarawak enggau Sabah, lalu pengawa ngulihka bekal tu mega deka napi mayuh penanggul.
Bejaku pasal atur ngaduka jalai alun ba sitak menua pesisir, ku iya, perintah deka mminta kompeni-kompeni balak ke ngena jalai nya sama mantu ngeluarka ungkus kena ngaduka jalai alun.
Pengawa nemuai Mohd Shafie sepengelama 3 hari ke sitak menua pesisir Sarawak disadang ambis sehari tu, iya nya pengawa nemuai ngagai rumah panjai iban, Rh Melintang ba Sungai Gaat,Balleh, kira-kira tujuh jam ari pasar Kapit enti bekenaka perau. — Bernama
0 comments:
Post a Comment