BETONG: Sapit Kepala Menteri, Datuk Patinggi Tan Sri Alfred Jabu ak Numpang enchabar sereta ngasuh Penyanding Penemu Parti Keadilan Rakyat (PKR), Datuk Seri Anwar Ibrahim datai nemuai ngagai menua sarawak kelebih agi ngagai sitak Betong.
Ku iya, sigi patut Penyanding Penemu PKR nya nemuai ngagai menua tu kelebih agi nemuai ngagai sitak Betong lalu meda kediri empu pemansang ke udah digaga ulih perintah Barisan nasional (BN) ba serata menua tu.
“ Sekali lagi aku ngasuh Anwar nemuai ngagai Sarawak lalu meda kediri empu tiap pemansang ke udah digaga kitai ba menua tu lalu lebuh iya pulai baru ngagai sitak iya ba Permatang Pauh, Pulau Pinang ngasuh iya nusui pemansang ke bisi ba Sarawak ngagai rayat ba sitak iya din,” ku iya.
Jabu ti mega nyadi Menteri Ngemuden Betanam Betupi enggau Menteri Pemansang Menua Pesisir Sarawak madah baka nya lebuh bejaku maya bejadika atur pengawa Makai Lemai Sokanjaya 2010, Opis Kereja (JKR) sitak Betong ba Dewan Tan Sri Datuk Amar Stephen Kalong Ningkan semak ditu, malam kemari.
“ Anang semina bejaku besai, aku enchabar iya (Anwar) nemuai ngagai Sarawak lalu lebuh datai ditu buka besaika mata awakka ulih meda tiap pemansang ke bisi ba menua tu.
“ Ti ditemu aku, Sarawak terus mansang lalu dawa Penyanding Penemu PKR nya ke madahka Sarawak nadai pemansang nya cherita ke bula, nya alai aku terus enchabar iya nemuai kitu lalu ukai semina bejaku besai ari belakang aja,” ku iya.
Iya madah, nengah Langgur Malaysia ke-10 (RKM-10), perintah deka terus beratika pemansang ba sitak menua pesisir awakka tikas bida entara sitak menua pesisir enggau nengeri udah tu ila sama rata.
“Ke ditemu kitai, menua Sarawak chukup pemansang lalu ukai semina nya aja, nengah RMK-10 ti deka datai tu ila, perintah menua enggau perintah besai deka terus beratika pemansang ba sitak menua pesisir.
“Lalu diatu, iya udah ngayanka dawa Anwar ke madahka menua Sarawak nadai pemansang siti cherita ke bula,” ku iya.
“Nya alai, aku ngasuh rayat Sarawak anang mendingka jaku raban penyakal kelebih agi sida PKR ke mutar belitka cherita sereta mechahka penyerakup rayat kitai ba menua tu.
“Aku madah ngagai sida ke nitihka Anwar Ibrahim sereta ketuai PKR ke bukai ba menua Sarawak tu awakka sida iya pulai baru ngagai jalai ke lurus lalu buka mata sida iya meda pemansang ke udah digaga ulih perintah BN ke betuaika Pehin Sri Haji Abdul Taib Mahmud.
“Utai ke bendar, sigi nadai jalai bukai ba sida ke masuk gempung penyakal lalu iya mega udah ngayanka bala ketuai tauka pemesai PKR, DAP sereta Parti Penyakal bukai ba Semenanjung Malaysia, Sabah enggau Sarawak udah belabuh bepechah entara sida iya empu,” ku iya.
“Ukai semina nya aja, mayuh raban Parti Penyakal ba Semenanjung, Sabah enggau Sarawak udah pulai baru ngagai BN, ketegal sida iya udah nemu betuaika BN siti jalai ke pengabis manah.
“Diatu pan ulih dipeda kitai Parti Penyakal makin enda stabil penuduk sida iya, laban rayat udah enda arapka sida agi kelebih agi lebuh betuaika Anwar Ibrahim,” ku iya.
Nya alai ku Jabu nambah baru, ukai pekara ke muntang deka ngemansangka menua enti nadai sukung padu rayat nya empu lalu iya (Jabu) ke mega siku ari ketuai BN meri besai terima kasih ngagai BN ke betuaika Pehin Sri Abdul Taib Mahmud laban udah mai mayuh ubah pemansang ngagai menua Sarawak.
Sama bisi datai ba atur pengawa nya, Senator Dato Sri Empiang Jabu, Menteri Muda Ngemuden Betanam Betupi, Datuk Peter Nyarok Entri, Kaban Parlimen Lubok Antu, William Nyalau Badak, Kaban Kunsil Nengeri (ADUN) Bukit Saban, Robert Lawsan Chuat, Pegawai Pelilih Menua Betong, Friday Belik, Injinia Opis Kereja (JKR) Betong ti mega Chermin Kelab Sokanjaya JKR Betong, Richard Tajan, bala ketuai opis perintah, orang gawa ba JKR, ketuai pupu raban bansa enggau orang mayuh ari sitak nya.
Ba atur pengawa nya mega, Jabu mega madahka meri ungkup dalam penyampau RM 10,000 ngagai Kelab Sokanjaya lalu iya pan bisi meri ungkup RM 5,000 ngagai Tabung Pelajar nya mega.
Kelimpah ari nya mega, Jabu mega bejadika Majalah Kelab Sokanjaya Sitak Betong sereta Koperasi Sokanjaya Sitak Betong.
0 comments:
Post a Comment