KUCHING: Raban bansa bukai enda tentu besetuju enggau penemu raban bansa Iban ti minta Majlis Adat Istiadat ngubahka adat ti udah dipegai raban bansa tu kenyau ari kelia.
Bekau Sapit Presiden Gabungan Persatuan Malanau Sarawak, Wan Zain Syed Mohdzar madahka Melanau mega bisi adat nyadi adat tu enda ulih diubah peneka ati laban iya bekaul enggau pekara lama sereta penti pemali.
Ku iya, enti raban bansa Iban deka ngubah Adat sida ti bisi diatu sereta dipegai ngelama tu, dia sida deka nadai agi adat.
Iya madahka, sida Iban kaya ba penti pemali ti dipasuk dalam adat, nyadi berubah ari ai siti ngagai ai siti.
“Ambika banding sida Iban Batang Rajang bisi adat kediri ti enda sebaka tauka nyelai ari Adat sida Iban Batang Saribas tauka Skrang enggau Krian.
“Nya alai nyangka tusah utai tu deka diubah laban iya tau ngerusakka nama Adat ba bansa Iban ti udah dikena ngelama tu,” ku iya.
Ku iya, nya alai raban bansa ti ngubah adat ti udah bisi dalam raban bansa sida dia sida tu udah ngejang ari adat ti ditinggal aki ini tauka urang tuai kelia.
Nyebut pasal sarak ba perenggan 159 Adat Iban 1993, ku Wan tu udah ditetapka adat lalu nya meh ukum iya.
“Iban ngembuan besai pemalu nya alai enti sida kena adat RM1 pan sida enda nemu endur engkah mua diri empu agi laban udah kena adat,” ku iya ti lalu nerangka semina undang-undang ulih baka Kanun Keseksaan lalu Akta ba menua tu sigi ulih diubah nitihka rentak pemansang menua.
Nya alai enti nyema urang ti sarak melaki bini dalam bansa Iban ti enggai ngena adat laban deka bebagika reta enggau minta ganti rugi, nupi anak dia sida tau ngagai Kut ngena undang-undang ti bisi ba perintah, ku iya.
Lalu pia mega enti nyema bisi raban bansa tu ditangkap enchuri iya tau dibai ngagai polis awakka dibichara ba kut laban enti nitih Adat Iban ukum penyalah ti baka tu mit.
“Aku enda tentu berani madahka Majlis Adat Istiadat enda patut ngubah Adat Iban tu, tang ti nundaka Adat ti ditinggalka urang tuai kelia enda patut diubah,” ku iya.
Wan ti mega Presiden Mimbar Permuafakatan Ibubapa Malaysia (MAPIN) mansutka jaku tu lebuh ti dipinta ngenangka ripot surat kabar tu ti minta MAIS ngubah Adat Iban.
Ripot tu ngundan penerang ari Pemancha Wilson Siang Lim.
Nambahka nya, Wan madahka Iban bisi adat nyanyap ti udah dipegai raban bansa tu ari kelia menya taja pan diatu orang baru enda tentu deka kena adat nya.
Enda patut tu diubah laluka chara nyanyap moden, ku iya.
Ku iya, enda patut adat enggau penti pemali ti bisi dikembuan raban bansa Iban ngelama tu dimodenka
0 comments:
Post a Comment