Pekit nulis surat ngayuka ‘Gagasan 1Malaysia’

Lebih 52,000 iti surat ari raban nembiak sekula nuju PM di serata Malaysia dianjung masuk pekit tu

KUCHING: Pekit Nulis Surat ngagai Menteri Besai (PM) Datuk Seri Mohd Najib Tun Razak udah ulih narit ati mayuh bala raban nembiak sekula mantaika pengelandik sereta penemu diri ngarang sereta nulis surat.Menijar Pos Malaysia Berhad Menua, Mohamad Nasir Ismail madahka pekit tu meh alai bala nembiak sekula mantaika penemu sereta pengarap sida iya besangkut paut enggau ‘Gagasan 1Malaysia’.

“Pekit tu iya nulis siti surat ke dituju ngagai PM bekait enggau pelin tauka penemu bala nembiak kemaya hari tu, pemerat beratika penyerakup bemacham pupu raban bansa sereta diau beserakup sereta likun enggau pangan diri, lalu mantaika penemu sida iya bakani runding sida iya ngetanka pemanah penyerakup diau enggau pangan diri nitihka konsep 1Malaysia,” ku iya lebuh bejaku enggau pengarang berita ditu kemari.

Dulu agi ari nya, Mohamad Nasir udah bejadika atur pengawa pekit tu iya nya ‘Nyerahka Surat Ngagai Menteri Besai’ ba SMK Tunku Abdul Rahman (STAR) ditu, kemari.

Pekit Nulis Surat ngagai PM tu siti ari penemu ke dibantai Menteri Pemadah, Komunikasi enggau Main Asal, Dato Sri Utama Rais Yatim, maya iya nemuai ngagai Pos Malaysia taun siti nyin tadi, lalu udah mujur dipejadika Najib empu kena 29 Disember 2009 ba Kota Kinabalu.

Pekit nulis surat entara sekula serata menua tu diatur Pos Malaysia begulai enggau Opis Suruhanjaya Komunikasi enggau Multimedia lalu disukung Opis Menteri Pemadah, Komunikasi enggau Main Asal, Opis Menteri Pelajar, enggau Radio Televisyen Malaysia (RTM).

Nyadi maya pengambis pekit tu udah diubah baru ngagai 19 Mac tu ila ngambika meri awak ngagai mayuh agi nembiak sekula ulih masuk pekit tu, sereta meri endur alai sida iya mantaika pengelandik sereta penemu diri.

“Penemu tu ke ngemeratka penyerakup entara semua pupu raban bansa patut digaga nyadika chunto ke manah ba renggat ke tumu baka ke diatu ba sida nembiak sekula kemaya hari tu. Laban sida tu ila ke nyadi pelapis megai menua sereta deka neruska pengawa nyerakup tiap pupu raban bansa ke sigi udah lama dikereja rayat Malaysia.

“Pekit tu siti pekit ke manah laban iya deka mantaika penemu raban nembiak kemaya hari tu, pemereti sida iya senentang 1Malaysia nengah mayuh macham aspek pengelantang pendiau, adat rama, politik, sereta ekonomi rayat ke mayuh macham pupu raban bansa, ngambika penemu tu mujur nitihka objektif ngembuan bansa Malaysia ke beserakup sereta progresif,” ku iya bejaku baru.

Pos Malaysia sereta sekula ke ngatur pengawa tu naga tiap sekula ba serata menua tu nganjung dalam urung pengabis kurang 10 iti surat nengah pekit tu.

Taja pia, STAR mujur ngumpul dalam urung 910 iti surat ari bala nembiak sekula dia.

“Tu penyampau surat ke mayuh endar sereta manah ke ngayanka nembiak sekula sigi pelapis ke udah nemu pasal konsep 1Malaysia sereta tau dijadika chunto ba nembiak sekula bukai ngamatka konsep 1Malaysia tu,” ku iya.

Ari pemayuh surat ke dianjung tu (910 iti) semina 600 iti surat ari STAR deka dianjung ngagai Kuala Lumpur ke deka masuk pekit begulai enggau sekeda sekula bukai serata menua tu.

STAR nyadi sekula kedua ba Sarawak sereta entara sekula ba Malaysia ke mujur ngatur pengawa tu kelimpah ari 600 iti surat ke deka dipilih lalu dianjung ngagai pekit nangkan tu ila.

Enam ratus iti surat nuju PM ari nembiak sekula STAR disua kepala pengajar sekula, Rakayah Madon ngagai Mohamad Nasir ba dewan sekula nya kemari.

Pos Malaysia deka terus meri kerejasama ngagai sekula bukai ke bisi ngayanka minat sereta komitmen sida iya besereta enggau pekit tu.

Sekula bukai ke dipelaba deka sama sereta masuk pekit tu nangkan STAR tu ila, iya nya SMK Petra Jaya, SMK Batu Lintang, SMK Stampin, enggau Maktab Rendah Sains Mara.

“Surat nuju PM tu sebedau iya dipilih iya deka ditapis dulu ulih sekula alai nembiak nya. Tang datai ba KL ila, kami mega bisi siti komiti ti deka milih surat tu,” ku iya.

Naka kediatu penyampau surat ke bisi diterima serata menua Malaysia bisi dalam urung 52,000 iti surat, taja pan Mohamad Nasir nadai madahka pemayuh surat ke bisi diterima ari sekula ba Sarawak.

“Sekula ke ngasuh kami (Pos Malaysia) ngambi surat PM ba sekula ngambi sida nadai dicaj mayar stem.

“Kelimpah ari Kuching, kami agi nganti surat PM ari sekula bukai ba pelilih menua tu baka ba Sibu, Miri enggau Bintulu. Naka kediatu, kami bedau nerima sebarang pekit surat ari sekula ba menua pesisir. Tang enti bisi ari menua pesisir, iya sigi manah, laban nya tau ngangkatka sekula sida iya taja pan sida iya diau ba menua pesisir,” ku iya.