SRI AMAN: Menteri Muda Dagang Temuai enggau Pesaka Tuai, Mong Dagang madahka pengirau iya laban diatu penyampau nembiak lelaki ti nyambung pelajar ngagai universiti kurang enti dibanding enggau orang indu.
TERIMA KASIH: Mong (tiga kanan) nerima tanda pengingat ari Tuai rumah Gading Duya, Ran Ulu ba pengawa nya. Masir Kujat (empat kanan) mega bisi datai.
Nitihka Mong, pekara nya ngirauka laban perintah deka meda penyampau indu enggau lelaki nyambung belajar ngagai tikas ke tinggi agi sama sebela.
Iya ngelalau apai indai nembaik ngambika meri peransang ngagai anak kelebih agi ngagai anak lelaki ngambika sekula bebendar lalu ulih nyambung pelajar ngagai universiti setipak enggau orang indu ke endang mayuh mujur.
“Aku irau meda penyampau nembiak lelaki kurang ari orang indu masuk ngagai universiti,” ku iya ke mega nyadi Menteri Muda Betanam Betupi (Pansik enggau Atur).
Nama kebuah pekara tu nyadi lalu dini penyilap dataika orang lelaki kurang masuk ngagai universiti?,” tanya iya.
Mong ke mega nyadi Kaban Kunsil Nengeri Bukit Bangunan mansutka jaku nya lebuhka bejaku ba pengawa makai malam JKKK enggau bejadika Serakup Indu Dayak Sarawak (SIDS) Unit Ulu Sri Aman ba Dewan Suarah ditu kemari.
Kelimpah ari nya, Mong ngelalau rayat ba daerah nya ngambika nyukung perintah Barisan Nasional (BN) awakka terus mansang enggau maju.
“Sida nya (parti penyakal) semina nemu nguna peluang ngagai rayat ba menua pesisir iya nya mantaika jaku sebubu ngapa, mantah pengari rayat BN lalu ngasut rayat ngelaban perintah ke guna politik sida empu.
Ba pengawa nya, Mong ngungkup RM5,000 ngagai JKKK Ran Ulu kena ngatur Projek Kecil Luar Bandar (MRP).
Bisi sama datai ba pengawa nya Kaban Parlimen Sri Aman Masir Kujat, Chermin SIDS Bahagian Sri Aman Roslind Abunawas, Pegawai Pemadah Parlimen JASA Lubok Antu Geoffery Baja Ricky Maba enggau tuai-tuai raban bansa kandang menua Sri Aman.
0 comments:
Post a Comment