Kabinet mit menteri ditusun baru, pia ku Taib

Tu kena nyungkak sereta bejalaika pengawa pemansang bebendar agi ke bisi di menua tu

KUCHING: Kepala Menteri Pehin Sri Abdul Taib Mahmud kemari madahka atur tusun kabinet mit ke baru deka berengkah kena 2 April 2010.

MERI PENERANG: Taib (tengah), Jabu (kiba) enggau Dr Chan (kanan) ba pengawa atur nusun kabinet mit kemari.

Sida nya Kaban Kunsil Nengeri (ADUN) Dalat dipaduka nyadi Menteri ba Opis Ketuai Menteri, Fatimah Abdullah; ADUN Tanjung Batu Datuk Adnan Satem nyadi Penyanding penemu ke mega Menteri ba Opis Kepala Menteri, enggau ADUN Batu Kawah, Tan Joo Phoi nyadi Sapit Menteri ba Opis Kepala Menteri .

Fatimah sebedau tu ti nyadi nyadi Menteri Muda Betanam Betupi ke bekaul enggau pasal Ekonomi Ruang Bilik enggau Latih.

Kelimpah ari nya Fatimah mega nyadi Menteri Muda Pemansang Orang Indu sereta nyadi Menteri Muda Perengka Guna Mensia Mayuh enggau Pengawa Latih.

Fatimah ke nyadi Menteri ba Opis Kepala Menteri nya megai tanggung pengawa nyengkaum pasal pelin enggau latih perengka guna mensia mayuh, sereta ngemansangka orang indu enggau ruang bilik, pelajar enggau pengintu anak mit , Opis Pelajar, Dewan Bahasa enggau Pustaka kelimpah ari bejalaika tanggung pengawa ti diberi Kepala Menteri.

“Sebedau tu Fatimah amat gawa bebendar ngemansangka pelajar nembiak mit, nambahka nya iya endang ulih beserakup dalam ngereja pengawa,” ku iya.

“Ba portfolio ke baru tu iya megai tanggung pengawa ba Biro Orang Indu ke sebedau tu dibaruh Menteri Urbanisasi dan Pemansang Rama.

“Kelimpah ari nya Ekonomi Ruang Bilik ke dibaruh Menteri Betanam Betupi Moden mega dijaga iya ti nyadi Menteri ba Opis Ketuai Menteri,” ku Taib.

Fatimah siku ari orang indu ke manah ba pengawa politik Sarawak enggau Parti Pusaka Bumiputera Bersatu (PBB), iya mega Sapit Ketuai Orang Indu.

Taib mansutka jaku nya lebuh pengawa betemu enggau media ba Wisma Bapa Malaysia ditu kemari.

Nambahka Fatimah, Adenan Satem mega dipaduka nyadi Penyanding Penemu ba Opis Kepala Menteri.

Tanggung pengawa iya nyengkaum pekara ti bekaul enggau mensia mayuh, pemadah enggau penabur.

“Aku ngambi Adenan baru megai pengawa pengawa ti bekaul enggau mensia mayuh, iya mayuh peneleba ba pekara nya ,” ku Taib.

Adenan siku ari bekau Menteri Betanam Betupi dalam Kabinet Nengeri sebedau iya ke nyadi Menteri Pengeraja Asal enggau Rampa Menua ba Kabinet Persekutuan.

Kelimpah ari Fatimah enggau Adenan, Tan Joo Phoi siku ari orang ke baru dipaduka ba atur kabinet mit kemari.

Tan Joo Phoi ke nyadi udah dipaduka nyadi Sapit Menteri ba Opis Ketuai Menteri ke megai tanggung pengawa ba pekara rampa menua.

Taib madahka lebuh pengawa betemu enggau media madahka, mayuh program ti diatur kena ngemansangka menua baka tekad ai ba Murun, Baram, Limbang sereta Belaga, lalu semua nya bekaul enggau rampa menua.

“Diatu kena ngemansangka menua kitai macham projek ke udah ditaga baka tekad ai ba Murun, Belaga, Balleh enggau Limbang, semua nya bekaul amat enggau rampa menua, ku Taib.

“Tan ke megai portfolio baru nya mantu ngemeratka pengawa ke baul enggau rampa menua,” ku taib.

Tan nyadi Chermin Parti Rayat Bersatu Sarawak (SUPP) Batu Kawa enggau Komiti Kereja Pusat (CWC) SUPP.

Penudi iya Ketuai Menteri ngadu atur Kabinet nengeri iya nya 1 Disember 2009, lebuh iya ke madahka atur nya 8 November 2009. Maya nya bisi enam iku sida ke baru dipaduka iya.

Bisi sama datai ba pengawa betemu enggau media nya, George Chan, Jabu, William Mawan enggau kebukai.