SRI AMAN: Bala kaban Komiti Pemansang enggau Pengelikun Pendiau (JKKK) dipinta anang enda beratka pelajar bala nembiak rebak baru diatu laban pekara nya deka ngemudahka agi perintah ngasilka mayuh agi orang ke landik sereta bisi peneleba dalam pemansang menua kitai tu.
Menteri Muda Pemansang Tanah, Datuk Francis Harden Hollis ke mansutka penemu nya madah, semua JKKK di Menua tu enda patut mina fokus ngagai pengawa pemansang aja, tang mega patut meri kemeran ngagai pemansang pepalar sekula bala nembiak rebak baru diatu.
“Bala nembiak rebak baru diatu patut disikap enggau naka pemayuh penemu ulih sebedau kitai nyingkang ngagai era 2020. Laban enti nadai bekal penemu tu chukup, sida deka betangkup enggau penusah sereta penanggul besemekih enggau orang bukai dalam pasar kereja enggau semua pekara bukai dalam dunya globalisasi nadai sempadan tu.
“Nya alai dalam pekara tu, ngena bendar genap iti JKKK ba semua kampung enggau rumah panjai bejalaika tanggung pengawa baka merambu pelin timpuh panjai enggau enda pandak besangkut paut enggau pelajar sekula bala nembiak rebak baru, laban bala sida tu meh ila nyadi aset sereta pesaka berega menua Malaysia kitai tu ke mega endang disadang nganti penuduk bala ketuai menua kitai dudi hari ila,” ku iya.
Harden ke mega Kaban Kunsil Nengeri Simanggang mansutka jaku nya lebuh bejaku ngagai Utusan Borneo ditu udah bekau tembu bejadika Kimpin Pemeresi enggau Program Gotong-Royong Tagang Denggi ke diatur Opis Kunsil Pelilih Sri Aman (MDSA) di Rumah Nyameng Gerinang, di Klassen Simpang Undop, ditu apin lama.
Ku Harden madah, menua kitai endang amat besai endar guna ka raban ke pandai kena mantu dalam pemansang menua tu ke datai ngagai 2010 ila, genap iti pintu bilik dikarapka ulih ngasilka abis nadai siku graduat.
“Enti nyema bala apai indai nadai keran nyengula bala anak sida, nya alai JKKK mega tau dikumbai puntan pemujur dalam bejalaika tanggung pengawa sida dalam pekara tu, nya alai kitai enda ulih nyalahka bala anak enti sida terus tinggal singkang dalam pelajar sekula laban apai indai enda bebendar bejalaika tanggung pengawa sida nyengula anak enggau naka ulih,” ku iya sereta madah, apai indai enggau JKKK patut sama berakup sereta begembar enggau pangan diri dalam pengawa nyendiaka rampa menua enggau alai pelajar sekula ti kondusif ungkup bala anak sida.
Dalam pemansang ti sama, iya mega ngansak bala rayat ngambika semampai nyukung lalu bediri tegut di belakang Barisan Nasional (BN).
“Ngelamatu perintah endang udah sigi bebendar ngereja pengawa ti chukup manah ungkup penyenang enggau pengelantang rayat,” ku iya madah.
Sama bisi datai ba pengerami nya mega Ketuai Opis Pemadah sitak Sri Aman enggau Betong Charles Sigat Ason; ketuai Opis Pekara Nyemetak (JASA) Sarawak sitak Sri Aman enggau ketuai Parlimen P.202 Sri Aman, Whelton Lumpoi; Sekiteri Pribit ka Menteri Muda Pemansang Tanah Jerome Runggol; sereta sapit chermin MDSA Kunsilor Jimmy Chong.
Dalam pengerami nya Harden mega bisi madah agih ungkup taun 2009 ngagai JKKK Rumah Nyameng penyampau RM3,000, sereta mega RM2,000 diungkupka Biro Indu sida ba rumah nya kena sida bejalaika pengawa sida dalam taun tu.
* Sumber petikan dari Utusan Borneo
0 comments:
Post a Comment