KOMEN ‘SIRAT’ TEGAL SUNTUK PENEMU

Hadi nyimpang kena sengaja meba runding rayat pasal isu penyakal alah

KUCHING: Isu pasal ‘cawat’ tauka sirat terus nyadi buah kenang. Sekali tu gintir presiden Parti Progresif Demokratik Sarawak Dato Sri William Mawan Ikom ngutuk komen pasal ‘cawat’ ari presiden Parti Islam SeMalaysia (PAS) Datuk Seri Abdul Hadi Awang.

Mawan ketuai Dayak, baka ketuai ke bukai, sama ngutuk penemu ari Hadi nya ke balat ngemaruh raban bansa Dayak, lalu ngayanka tuai penyakal nya balat suntuk penemu pasal pekara kebendar di Sarawak.

Lebuh ke bejaku ba pengerami mungkal penumbuh SPDP sitak Muara Tuang malam hari Enam, Mawan berupai ngeransi pasal penemu ketuai PAS nya.

Penemu ari Hadi nya, ku Mawan, ke mega Menteri Pemansang Sosial enggau Urbanisasi terang ngayanka pengurang penemu tuai penyakal nya pasal gaya pendiau enggau pengidup kontemporari raban bansa Iban di Sarawak.

Ku menteri nya, ba dunya moden kemaya haritu, nadai agi orang besirat, lalu penemu Hadi nya tanda iya enda nemu stindit pengidup raban bansa di Sarawak.

“Bala raban bansa kitai endang amat bisi ngena sirat enti sida ngajat ba panggau dalam pengerami ungkup kena merindang mensia mayuh dalam bantai main enggau adat asal Iban, nya alai laban pelaba aku Hadi enda kala nemuai ke Sarawak, nya alai iya nadai nemu mesai bulu mata tikas pengidup raban bansa di Sarawak.

“Nadai kebuah iya (Hadi) nyimpang ke bukai ari isu nama kebuah penyakal alah di (atur bepilih mit) Batang Ai lalu ngenang pekara bukai kena ngemeba ati enggau runding mensia mayuh, baka ngenang pasal orang besirat,” ku iya.

Hadi, dalam ripot Malaysiakini kena 11 Julai dipadah bisi mansutka jaku madah: Dalam semua atur bepilih mit, pemutus undi endang selalu chundung ngagai kami. Mina di Batang Ai kami alah laban sida enda nemu ngundi, agi ngena sirat. Aku ukai deka ngemaruh, tang ba endur bukai, orang bengepan manah, lalu ngundi PAS.”

Atur bepilih mit Batang Ai dipejalaika kena 7 April udah bekau kerusi nya nadai agi pengari ditinggal pemati tudah niang

Datuk Dublin Unting Ingkot kena 24 Februari tegal sakit jantung. Sama dipejalaika serentak maya nya mega atur bepilih mit di Bukit Selambau enggau Bukit Gantang di Semenanjug.

Dalam pengawa bepilih mit di Batang Ai tu tadi pengari PRS, Malcolm Mussen Lamoh ari BN menang ngalahka chalun Parti Keadilan Rakyat (PKR) Jawah Gerang, bekau MP lima penggal Lubok Antu enggau majoriti besai 1,854 undi.

Nya atur bepilih mit tunggal ke alai BN menang dalam semua enam iti atur bepilih mit di sekayu Malaysia udah bekau bepilih besai Mac 2008.

Lebuh bejaku ngelalau SPDP sitak Muara Tuang, Mawan ngarapka semua kaban parti nya ulih gawa berakup enggau bala kaban parti komponen BN ke bukai lalu ngasuh BN nyadi parti ti kering.

Taja pan sitak parlimen Samarahan enggau sitak kunsil nengeri Muara Tuang ukai dipegai SPDP, iya madah parti nya sigi besai tanggung pengawa dalam negapka agi penuduk BN lalu ngujungka chalun sida menang.

Muara Tuang diatu diarika Dato Sri Mohammad Ali Mahmud ari Parti Pesaka Bumiputera Bersatu (PBB). Lalu penuduk ba sitak KN Asajaya nya dipegai Abdul Karim Rahman Hamzah, lalu sitak parlimen Samarahan diarika Dato Sri Sulaiman Abdul Rahman Taib, ke sama ari PBB.

“Enti kitai meda kandang menua ditu, SPDP amat nadai YB (ngarika penuduk ditu). Tang bala kitai patut ngayanka tanggung pengawa kitai ngulihka sukung ari rayat mayuh (pengundi) kena nentuka parti komponen BN ditu menang ba siti kandang menua ke alai kitai nadai YB.

“Tu meh siti tanda pengeran enggau sukung ari bala SPDP sitak Muara Tuang dipinta aku, ke terang nyadi chunto pemanah sukung parti kitai laban enti kitai endang semampai berakup enggau parti komponen bukai, kitai sigi ulih menang dalam pengawa bepilih ti ka datai tu ila,” ku Mawan ke madah diri gaga bendar ati meda SPDP nya siti parti ke bisi kaban ari semua pupu raban bansa di Sarawak.

“SPDP tu siti parti komponen di Malaysia ke sigi amat datai ari semua pupu raban bansa. Komiti kitai mega ari semua bansa. Lalu bakanya mega gaya pendiau enggau pejalai parti, penemu sereta prinsip, endang sigi ari semua pupu raban bansa,” ku iya.