Bisi siti da agi nengeri baru di Kuching

ya deka digaga ba tanah 5,000 ikar belabuh ari Rambungan mansa Jalai Sultan Tengah

KUCHING: Siti agi sitak nengeri baru deka digaga ba Petra Jaya maya tanah pemesai 5,000 ikar ke ulih alai ngaga 45,000 unit rumah sepemanjai jalai ari Rambungan, Telaga Air mansa Jalai Sultan Tengah ditu, dipeda bisi awak dikemansangka.

Menteri Pengawa Berumah Datuk Amar Abang Johari Tun Openg madah, iya ngarapka sitak alai orang mayuh diau deka dikemansang sepemanjai sitak jalai nya ila.

“Tanah ke bulih 5,000 ikar sepemanjai jalai nya ulih alai ngaga 45,000 unit rumah, lalu kelimpah ari nya, HDC sedia deka bekerejasama enggau kontraktor ngaga rumah ke bukai deka ngemansangka sitak nya nyadi siti nengeri baru di Petra Jaya.

“Enti pasal rega rumah ke digaga ba sitak nya, iya nitihka peminta pasar.

“Bisi sekeda sigi digaga kena orang ke begaji umbas iya, bisi sekeda rumah iya digaga enggau rega ke tinggi mimit (high end market),” ku iya madah maya ditemu ba atur pengawa nyerah kunchi rumah projek Taman Daya Riang ba Semariang ditu, kemari.

Projek rumah nya ke dipejalaika Syarikat Daya Perumahan Sdn Bhd (DPSB) ke becherminka Kaban Kunsil Nengeri (ADUN) Pantai Damai, Dr Abdul Rahman Junaidi nya mantaika konsep rumah moden tauka ‘kontemporari’.

Taman Daya Riang bisi 18 unit rumah ke besapak dua ringkat dijual RM320,000 ngagai RM460,000 seunit. Ari 18 unit nya, semina bisi siti unit ke bedau dijual.

Lebuh bejaku pasal design rumah nya ke nunda chara pendiau ke muden, Johari madah pemerani DPSB ngaga rumah ngena konsep kontemporari patut dipuji awakka sida iya deka sama besemekih enggau kompeni bukai ba industri tu.

“Enti suba DPSB sebedau tu di temu kitai ngemansangka projek rumah kos ke mit enggau umbas iya dipeda ulih ngemansangka projek rumah ke ‘elit’ sereta bekualiti,” ku iya lalu madah, kualiti rumah pekara ke patut di kemeratka awakka orang ke meli pan bepuas hati.

Kelimpah ari nya, Dr Rahman madah DPSB diatu pan benung ngemansangka 865 unit Rumah Mampu Milik (RMM) enggau 1,000 unit Rumah Mesra Rakyat (RMR) ke berega RM200 juta ba baruh ungkup pakej stimulus ke kala dipadahka Perdana Menteri (PM) bedau lama tu tadi.